新的開始

22 Dec 2008 (Mon)

終於第27週了，夠期去照4D，好奇想睇下阿b個樣，終於揭盅了。

我們去了Dr. Mo度照($800)，但今次阿b不是太合作了，初時用背脊”得”住我地，Dr. Mo就只可以幫他照內臟及度尺寸，Dr. Mo話阿b屬中大碼，比例係72%，(0-100%: 0係最細size，100係最大)，估計出世時會有7.5-8磅重。

然後醫生好努力咁推他，希望佢能夠另番轉頭比我們睇下，最後他只是比了個七分面我們睇，還要經常用手遮住塊面仔，之後還將隻腳仔放上頭頂遮住，真係百厭了﹗





老公話阿b個鼻同咀好大，好似唔係好啱比例咁，醫生就話個鼻似你law，又直又多肉，同埋唔係唔啱比例，而係bb塊面仲未有好多肉，所以望落去好似比例上大d啫，話個個bb都係咁的，叫我們唔使担心。




其實似邊個都無所謂啦，最緊要都係阿b健健康康、快快樂樂咁成長就好了﹗



全程照了25分鐘，醫生比番成個file report我，很精美的，內裡有檢查報告一張，15 張黑白相及2張A4 紙(裡面有11張彩照)，還有一隻DVD，我們都玩得好開心﹗

18 Dec 2008 (Thur)

好開心約左一班Baby Kingdom識的3月媽媽出來食飯，大家分享了很多懷孕心得及有用的資料。

大家都知道孕婦實要飲鮮奶的，但我由懷孕初期開始，每當飲鮮奶就會肚痾，令我苦惱不已﹗這晚她們跟我分享有隻十字牌低乳糖鮮奶係不會肚痾的，我便返去買來試試，點知真係無事喎，真係好多謝你地的分享﹗




這晚大家都傾得很開心，但奈何時間實在太少了，未能逐個傾談到，希望第日再有機會一齊出來分享下啦﹗同埋都希望第日大家的bb出世後，能夠一齊出黎gathering下，再傾下湊仔心得就好了﹗




當晚的場面都幾震撼下，我們成圍枱都是大肚婆，當我一到達酒樓時，侍應一見到我就知道帶我去邊張枱了；我們又成圍枱都無人飲茶啦；到食甜品時，侍應送錯木瓜糖水比我們食，我們就話lee度無人會食，就連侍應都覺得奇怪，還問我們點解，都真係幾攪笑呢﹗

5 Dec 2008 (Fri)

(第24 週) 今日去余醫生到覆診，一上磅…total重左16磅?

今個月突然之間急升左成6磅之多，真係有d嚇親﹗唔通真係食得多消夜所致

照超聲波的時候，見到阿b的輪廓都已經幾清晰了，面尖尖，個鼻好似似我，唔知第日出到黎個樣似邊個多d呢
余醫生話阿b而家已經有磅半了，發育得好好，真係安樂晒﹗

事關之前我病足幾個星期，又要食藥，真係好怕會影響到阿b的。



另外順便book埋3月14日開刀，希望阿b乖乖地到果日先出世la﹗

23 Nov 2008 (Sun)

搵了四個星期，終於請到工人了。而家請工人真係好頭痕，原來除了我們揀工人外，工人都要揀雇主的，好多一聽到要湊初生bb就話唔做 le，嫌辛苦同麻煩。

希望我們請這個姐姐乖乖地、勤勤力力咁做野la，唔好俾麻煩我們就好了﹗

17 Nov 2008 (Mon)

香港人情紙咁薄，人人只顧自己的利益，已經缺乏了人人為我、我為人人的精神了。

未大肚前，我都會樂意讓座於有需要的人仕。但大肚後，也只好間唔中有人會讓座給我了。

但今天遇到件感動的事，亦同時遇到些自私自利的人。

話說今早返工時，在太子上車，一上到車就有個阿伯站起來叫我去坐，但我見他都一把年紀了，都不好意思坐，於是你推我讓了一會，最終阿伯都堅持要我坐低，很是感激他﹗心想真的人間有情!

但估不到的是，到了下一站 ，坐我隔離的女仕居然起身落車，明知自己都就落車了，見到我倆擾攘一輪也無動於衷，真係……..

更離譜的係，她一起身，有個女士即時zip埋來坐低左，我真是望到眼定定呀﹗

真係太過份了﹗

攪到阿伯無得坐，還跟我一樣要到中環才下車，令我真的過意不去﹗

其實現在只留意一下身邊,我們香港人已越來越自私及無禮貌了,就好似每日搭地鐵,有不少人,都不等別人下車,就衝上車搵位。

也許"人人為我、我為人人",也只有上一輩的老人家才會了。

14 Nov 2008 (Fri)

今日返廣華覆診，量完血壓、驗完尿後，等了很久先見到助產士，入到房，姑娘首先用手按下我個肚，再用把尺度下個肚，然後就拿了部機出來聽bb心跳，之後就巡例問下我有無咩問題，之後就走得了，就連磅重都無，好似幾兒戲咁。唔通淨係摸下按下就知bb 的位置和size啱唔啱

12 Nov 2008 (Wed)

昨晚瞓到半夜隻右腳痛到醒，徹夜難眠。今朝起身後都隠隠作痛，又唔似抽筋，為什麼會咁痛呢

13 Nov 2008 (Thur)

昨晚隻腳持續咁痛，痛到我喊醒了呢﹗瞓又唔得、企又唔得、坐又唔得，行到一拐一拐，好辛苦呀﹗

今早決定去睇一轉醫生，慶幸地打了2個電話後就book到婦科醫生了，本來姑娘話無位的，但我就求她給個位我，於是她就叫我10:00到達(正合我意，早些睇、早些好)。更好彩的是，一落到樓，就有架的士迎面而來了，真係要感謝神了，事關我屋企好日都唔會有架的士駛入來，今日居然一落到樓就有車，真係超好彩﹗

去到張智醫生診所等了40分鐘就到我了，醫生幫我檢查右腳及照超聲波，他照阿b照得好詳細，跟我去廣華照結構差不多 (解釋得仲清楚過廣華)，同我睇阿b有無兔唇，又照佢個心、肺等器官，又同阿b的慈姑仔影大特寫，仲話我聽阿b而家已經有1磅重了。
最後醫生話我隻腳應該是筋發炎，開了止痛消炎藥及藥膏比我。埋單HK$480，好抵﹗

近來實在吃得太多藥了，抗生素都還未吃完，現在又要加多隻止痛消炎藥了，
希望阿b唔好吸收啦﹗您要健健康康、平平安安呀﹗

10 Nov 2008 (Mon)

今晚玩太豉的時候，阿b好似好鐘意首歌咁，不斷咁踢踢，好似打緊拍子咁，真係好可愛啊﹗

9 Nov 2008 (Sun)

已經咳了兩個星期了，真係咳到氣咳，最終都要去睇多次醫生。但醫生開了六日抗生素我食呀，真係好對唔住阿b tim，希望唔會影響到佢啦﹗

3 Nov 2008 (Mon)

(第20週) 明天終於照結構了，好緊張呀﹗希望阿b身體健康，樣樣都能夠順利過關啦﹗

今晚我教左佢明天要乖乖地舉起雙手被醫生數手指，希望佢聽話啦﹗事關我見人地d媽咪講話d阿b成日都鐘意用隻手遮住塊面唔比人睇的，好似特登整古你咁。

4 Nov 2008 (Tue)

今日準時到達廣華醫院，幸運地只等了15分鐘就到我了。醫生一坐低就話今次唔會照男定女，亦唔會數手指腳指，好cool咁。但佢都算細心咁逐part逐part咁睇，但就無乜同我地講野，只係話lee度係心、lee個係腎、lee度係膀胱….約12分鐘後，她就話照完了，樣樣都無問題，可以走了。過到關了，即時放下心頭大石﹗


今日要讚阿b一樣野，就係當醫生照阿b的頭時，阿b突然舉起雙手放係頭的兩側，我心諗梗係阿b以為醫生要同佢數手指了，所以扮投降，真係聽話了﹗可惜醫生唔理佢。

1 Nov 2008 (Sat)

(第19週)  今日好明顯地感到阿b係我個肚度郁動，好得意呀﹗我終於可以確確切切咁feel到佢郁了﹗Yeah! 

 

25 Oct 2008 (Sat)

今晚覺得好似發燒，

但探完熱又唔知算唔算發燒喎，事關大肚婆的體溫比正常人高，好苦惱，驚燒親阿b。穏陣起見，都係去播道醫院睇下先。9:30pm到達，好彩排第二，好快就有得睇了，探完熱後，醫生話我微燒，開左退燒藥、止咳藥和咳水俾我食，但就話唔好食咁多，食一兩次好了，叫我飲多些水及多些休息就會好了。



29 Oct 2008 (Wed)

本來我都無食咁多藥的，但實在咳得太厲害了，點知全部咳藥都食完，但都未好番。
但又唔敢再去睇醫生攞藥食了，唯有食康鈣C，希望吸收多d維他命可以快d好番啦﹗

24 Oct 2008 (Fri)

(第18週) 今晚好似feel到阿b踢我咁，好輕力，唔知真定假呢

17 Oct 2008 (Fri)

今日去了余醫生度覆診，當照超聲波時，余醫生話95%係囝，叫我們可以去買定衫仔及改定名了，好開心呀﹗

9 Oct 2008 (Thur)

(第16週)  望穿秋水，終於等到廣華的第一次產檢了。9:30am到達，之後就成日等叫名，度高磅重，驗尿，見助產士，照超聲波(但照唔夠一分鐘)，見醫生，攪完一輪，要成12:20pm先走得。可幸的就係，可以排到期照結構，真開心，可以慳番$800。

最攪笑的就係，他們居然要攞老公的身份証正本才登記落簿，我都已經帶了他的身份証副本及我們的結婚証書副本都話唔得，真是r爆頭。唯有下次帶埋佢本人來登記過啦﹗

1 Oct 2008 (Wed)
今天是我同跳跳虎拍拖八週年的紀念日，所以一早便訂定Marco Polo Hong Kong Hotel 的Cafe Macro食buffet睇煙花慶祝。但凡惠顧的客人可以在酒店六樓停車場觀賞煙花匯演，這兒的景觀不過不失la，只可以睇到2.5架”等”船發放煙花，但好處是不需太早到場覇位及不會太迫人，現場又有音樂的播放。(睇新聞講海旁一帶中午時份已無好位企了，真係好誇張的﹗)
跳跳虎6:30pm才到達都可以覇到頭位影煙花，而我就8:30pm才施施然去會合他（這時的尖沙咀已人山人海，很多道路已封閉了，而我亦兜了幾個圈才入到酒店）。其實唔駛影相8:45都一定有位你企,今年的煙花很壯觀，款式亦見新意，加上”澎澎澎”的爆炸聲響，很震撼﹗

Taken by poohpooh

Taken by 跳跳虎









睇罷後，我們就入去食buffet了，(今日分兩場食，第一場是9:00前，價錢$4xx，另一場是9:30 – 11:30，價錢只需$218未加一)。我們選擇食9:30那場，雖然平咁多,食物質素也沒有將貨就價,亦有很多東西吃，有魚生、生蠔、長腳蟹、sushi、牛扒、羊扒、即煮雲吞麵、咖哩、龍蝦湯、salad bar、甜品等等…….還奉送一杯餐飲。由于等到9:30先食,都開始餓了,所以覺得D食物都好好食!



食飽飽後，出到去街上，人群已散去，車輛亦比平時少，路面非常暢順，真慶幸我們選了食第二場buffet，避過了睇完煙花後散去的人潮。有得食有睇又唔太累，真的是不錯啊!

27 Sept 2008


上星期影完煙花后,跳跳虎心思思兼身痕,話上次影D煙花唔夠好要再去澳門影多次，我就同佢講話如果果日唔下雨同真係有船票送就去，無就唔去，當天觀察到下午天色還可以,於是四點半先出發去信德踫運氣。在離境大堂那層樓的珠江客運見到有人排隊，於是走去看過究竟，見到有poster貼出話憑金沙咭或濠會咭可以換取金光飛航的船票一張。該櫃台只派即場船票，我們出示了濠會咭及身份証，就換取了 6:00pm的船票了，Yeah!


7:00pm落船後，就跳上了威尼斯人的車了，(在場都見到有永利的車隊兜客)。車上有職員介紹如何換取免費回程船票，只要在威尼斯人、金沙或四季的賭場玩一個鐘頭就可以去客戶服務中心換取船票了(換法詳見 : http://hk.myblog.yahoo.com/poohpooh0805/article?mid=1003 )

由於時間緊迫，我們玩了半個鐘左右就要離開了。見到威尼斯人有間麥當勞,諗住是但買個餐食,點知以為去左歐州,普通套餐要HK$4X元,

唯有要一個最Cheap的Burger吧(HK$10)。臨走前我們去客戶服務中心問下船期先，點知已換到去零晨一點鐘的船票了，太夜了﹗而附近又有很多早已換了船票的黃牛黨在此兜售，叫價$120一張，經講價後，$110一張成交，成功買了11:30pm的船票。雖然換唔倒票,還好先前玩百家樂贏了HK$160元又抽了兩支水。


之後馬上飛的去海洋花園那邊搵位影煙花，不知是我們太遲來定係今日真係超多人呢?  沿海都已差不多圍滿晒人了，所以我們一見到有位就企埋去算了。


等不到10分鐘就開始了，今晚第一場是菲律賓，非常精彩，之後那場就是上年冠軍得主法國演出，但有點令人失望﹗因為法國的煙火很低及很疏。

Taken by poohpooh





Taken by 跳跳虎






10:20pm結束後，我們就去了對面的峰景餐廳食宵夜，點了一窩鮑片雞粥和米通魚球，再要了一罐玉泉忌廉，埋單$120，粥底好味但鮑片很韌、雞肉無味，而碟米通魚球夠彈牙很好吃,因有米通起外面,不用炸到很乾身,都可做到外脆內嫩。值得推介!
11:00pm匆匆結帳走人，搭的士往氹仔碼頭返香港。 由于氹仔碼頭侯船處走到船上都幾遠,要行5-10分鐘,所以真的要約20分鐘前到碼頭。另外先前聽說金光飛航很”拋”,今次回程見識過(去程又好似冇事),但聽到幾個乘客吐,有個話吐左三次!


就係咁我同跳跳虎玩左個好抵的澳門即日煙花遊，回到家都成1:30am啦!好彩先前睡左個晏覺!