新的開始

27 Sept 2008


上星期影完煙花后,跳跳虎心思思兼身痕,話上次影D煙花唔夠好要再去澳門影多次，我就同佢講話如果果日唔下雨同真係有船票送就去，無就唔去，當天觀察到下午天色還可以,於是四點半先出發去信德踫運氣。在離境大堂那層樓的珠江客運見到有人排隊，於是走去看過究竟，見到有poster貼出話憑金沙咭或濠會咭可以換取金光飛航的船票一張。該櫃台只派即場船票，我們出示了濠會咭及身份証，就換取了 6:00pm的船票了，Yeah!


7:00pm落船後，就跳上了威尼斯人的車了，(在場都見到有永利的車隊兜客)。車上有職員介紹如何換取免費回程船票，只要在威尼斯人、金沙或四季的賭場玩一個鐘頭就可以去客戶服務中心換取船票了(換法詳見 : http://hk.myblog.yahoo.com/poohpooh0805/article?mid=1003 )

由於時間緊迫，我們玩了半個鐘左右就要離開了。見到威尼斯人有間麥當勞,諗住是但買個餐食,點知以為去左歐州,普通套餐要HK$4X元,

唯有要一個最Cheap的Burger吧(HK$10)。臨走前我們去客戶服務中心問下船期先，點知已換到去零晨一點鐘的船票了，太夜了﹗而附近又有很多早已換了船票的黃牛黨在此兜售，叫價$120一張，經講價後，$110一張成交，成功買了11:30pm的船票。雖然換唔倒票,還好先前玩百家樂贏了HK$160元又抽了兩支水。


之後馬上飛的去海洋花園那邊搵位影煙花，不知是我們太遲來定係今日真係超多人呢?  沿海都已差不多圍滿晒人了，所以我們一見到有位就企埋去算了。


等不到10分鐘就開始了，今晚第一場是菲律賓，非常精彩，之後那場就是上年冠軍得主法國演出，但有點令人失望﹗因為法國的煙火很低及很疏。

Taken by poohpooh





Taken by 跳跳虎






10:20pm結束後，我們就去了對面的峰景餐廳食宵夜，點了一窩鮑片雞粥和米通魚球，再要了一罐玉泉忌廉，埋單$120，粥底好味但鮑片很韌、雞肉無味，而碟米通魚球夠彈牙很好吃,因有米通起外面,不用炸到很乾身,都可做到外脆內嫩。值得推介!
11:00pm匆匆結帳走人，搭的士往氹仔碼頭返香港。 由于氹仔碼頭侯船處走到船上都幾遠,要行5-10分鐘,所以真的要約20分鐘前到碼頭。另外先前聽說金光飛航很”拋”,今次回程見識過(去程又好似冇事),但聽到幾個乘客吐,有個話吐左三次!


就係咁我同跳跳虎玩左個好抵的澳門即日煙花遊，回到家都成1:30am啦!好彩先前睡左個晏覺!

21 Sept 2008

今朝瞓到9點起身落樓下食breakfast buffet，這兒的早餐都是一般啦，沒什麼大驚喜，都係一般的白粥炒麵、煙肉炒蛋腸仔、cornflake、麵包多士、生果之類。食完後，再次返去找周公。

瞓到11:30起身執野去check-out，之後坐shuttle bus 去碼頭轉車，hehe， 轉搭金沙的車去放低d行李，順便入去拿幾支水

及巡下場先。聽網友說金沙仍然有免費船票送，所以問了職員換票方法如下(1咭1票):
1)到賭抬玩一個鐘,記得俾金沙會員咭或威尼斯人的濠會咭D職員Count Time
2)係插張咭入老虎機度玩一個鐘,如純為拿飛就可以玩0.2鋪,慢慢玩一個鐘
(注意:大家自己衡量及小心不要貪小便宜,換票反輸幾舊,特別坐賭抬玩一個鐘,除了容易不知不覺輸錢及招騙徒.記緊不要跟陌生人說話(什麼送票,送籌碼,VIP優惠),後果非同小可!)

在玩老虎機時曾賺HK$168,後來倒輸HK$34,反正Package已包船票,唔玩啦!

約1:00pm，我們就搭的士去了新馬路那邊搵野食了。首先去了近大三巴那邊的”小上海鍋貼”食鍋貼，$1.2一隻，逐隻賣的，以街邊檔及價錢來說,味道不錯的，但皮煎久了是略硬,但肉質,肉汁依然很香,老公話都係香港的霸王山莊好食(一分錢一分貨ma!)。

之後行去十月初五街的”南屏雅敍”，點了碗南屏出前一丁、一個沙翁、一杯西洋菜蜜及一杯奶茶，埋單$35.5，它的南屏出前一丁的意思係指任揀3款餸，我們要了雞翼、朱扒和餐肉，它們煮的出前一丁好味到你估唔到，在香港的茶餐廳都吃不到咁好味的出前一丁，正﹗



之後一路向前行，到左另一間新賭場 – 十六甫，入面幾大幾Grand,可惜裡面煙霧彌漫
及有些疑似風水局
，唯一好處就係它的百家樂賭枱有$100玩，其他果幾間已經無咁低的投注額的賭枱了。從頭先玩老虎機的教訓，我們玩了幾鋪，嬴了二百蚊走人，見好就收﹗順便又拿幾支水先閃!


行下行下又到番新馬路那邊，見熱辣辣，便走左入義順嘆冷氣，食番碗薑汁撞奶($18)。之後搭巴士去漁人碼頭，入到去裡面，見到成個死城咁，人影都唔多個，唉﹗這兒只是開幕了年幾就攪成咁，真係慘不忍睹﹗最後行到去盡頭的萊斯酒店過冷河，估不到這間酒店細細，但裡面的裝潢卻很靚，很有歐洲feel，忍不住拍了幾張照。


之後返回金沙取行李，搭shuttle bus去碼頭轉車，今次轉搭葡京的車，去”四五六上海菜館”食晚飯，我們點了一碟全香酥鴨、小籠包及三鮮炒年糕，碟炒年糕很好味呀，連我老公一向都不喜歡吃炒年糕的都讚好味，而小籠包就見人見志啦，佢的皮很薄很有彈性,不是我們平時吃的那種皮,肉汁依然很多,我都係覺得霸王山莊好食d，最後埋單$226，用中銀信用咭有九折。
注意: 記住埋單前不妨問下咩咭有折呀，今次行程無一間店鋪主動話和寫出來有折扣，係要自己問佢地, 佢地先會答你架。同埋中銀信用咭幾多地方有折扣,記得帶埋去!

食飽飽後，搭車返碼頭走人，結束今次的澳門煙花滙演之旅。

20 Sept 2008

今次去澳門主要為了睇煙花滙演，其他就沒有什麼安排了，都是行下食下，過了兩日勁hea之旅。

今早搭11:00am船往澳門，到達後。離開碼頭第一時間找我們的酒店專車，今次我們入住了麗景灣酒店，找了一輪都不見我們的車，於是我們跳上了新世紀的車了(它就在我們酒店的對面)。

不消十分鐘就到達了。這間酒店的前身是凱悅酒店，是一間五星級酒店，價錢就很平宜，package price $1350。 由於太遲book package,只剩海景房要貴一點, 兩人船票加酒店，已包稅、早餐及夜航費用了也只是$1600，抵﹗ 一入房，無敵大海景就在眼前，正﹗房間間隔四正清潔，住得很舒服。







安頓好後，我們就去了威尼斯人酒店那裡觀光,並隨意在food court買了一碟白汁煙肉意粉及一個台南便當套餐，但都頗貴(約HK$ 120)，而味道一般一般la!


飯後就去了隔離新開張的四季酒店行了一圈，Lobby很堂皇，很有氣派, 但Casino就很細很一般。




之後返回威尼斯人的聖馬可廣場剛見到有個街頭歌舞表演，於是停下步伐，細心觀賞了。




接著口渴了,就入Casino拿番幾支水留番以後行程飲用,
本來想系咁二玩兩手,但是好像沒有了100元百家樂,200元1注太大不玩了,於是離開威尼斯人酒店吃晚飯去。

後來去了官也街的熊貓餐廳食葡菜，我們點了一碗很好味的帶子鮑魚湯 (裡面有兩片鮑片及兩粒帶子，味道滲著香濃的鮑魚味，正﹗不吃不可值得推介($25)、一碟芥茉燒羊扒 (碟頭大，但略嫌鹹了少少) 、烤焗牛仔肉、蒜茸炒雜菜及木槺布甸($8一個，抵﹗)，用中銀信用咭有九折，埋單盛為$214，認真超值﹗




飯後返回酒店稍事休息，就準備今次行程重點-澳門煙花匯演, 為了確保有利位置, 所以提早1.5小時去霸位影煙花, 約7:15pm從酒店出發往西灣大橋附近的海洋花園的海旁擺位睇煙花(從酒店行過去只需15分鐘)。這個位真係無敵，面向旅遊塔及兩條大橋中間，影相一流。其實這條海旁好寬有很多位置Set機,所以預早30分鍾搵位都OK.

今晚有兩場表演的，九點場是來自葡萄牙，十點場是台灣，每場約17分鐘。

Taken by Poohpooh







Taken by Poohpooh 老公












 先前聽朋友說澳門煙花滙演跟香港煙花規模小得多, 澳門只有一架船放, 由於事先有心理準備,看上去反而多了些驚喜,也覺很精彩呢!

睇完煙花成10:30pm，又係時間食宵夜了，我們去了酒店附近的一家茶餐廳吃了一碟幹燒伊麵，吃飽飽後，經過Crown Casino,去巡下場先,再完成例行公事, 拿番幾支水先,
就慢慢行返去酒店ZZzzzzzz……

12 Sept 2008 (Fri)

今日2:00pm去了威爾斯做Oscar test，以為有排等，點知一去到登記完，就可以入房見姑娘了。姑娘問了一堆問題後，就幫我抽血去驗，之後去了第二間房照超聲波，醫生話阿b瞓了覺，於是用力按我的肚皮，意圖弄醒阿b，如他所願，阿b好快醒來還好活躍地揮手揮腳，醫生又話給我們知，好大可能係囝囝(兩個醫生都那麼說，應該好confirm掛)。照了約20分鐘就完成了，阿b真合作，抵錫﹗

之後，好緊張地返屋企等結果，約4:00pm醫院就打來了，結果是1:6xxx 和1:17xxx，屬低風險，即時放下心頭大石，Thanks God!

8 Sept 2008 (Mon)



之前成日要閃閃縮縮咁迴避別人的追問(老人家話驚bb會小氣)，今日剛滿3個月，終於可以大大方方咁承認我大肚了。

5 Sept 2008 (Fri)

等了11週，終於見到余醫生的蘆山真面目了。

首先照超聲波，原來只是11週就可以睇到阿b已成個人形了，有頭、有身、有手、有腳，然後醫生開著個喇叭給我聽阿b的心跳聲，第一次聽到他的心跳聲，感覺好神奇﹗

(你地睇下，我已經唔係一粒小豆豆了，我有頭、有腳了
)

醫生還告訴我們阿b好大可能係囝呢﹗真係開心不已﹗
之後醫生問了一大堆問題後，就出來了。全程睇了約25分鐘，很詳細，同埋覺得余醫生好nice，有信心交託阿b給他接生了。

於是順手叫姑娘安排仁安牀位及打電話去蘇醫生處取消法國醫院的booking了。